سحر چاغي گئديرديم " ثبت اخترعات" دايره سينه. مئترونون توپخانا دوراغي گونده كي كيمي چوخ قالاباليق ايدي. قاتار گليب داياندي و ميللت يوگوردو مينسين مئترويا، منده چوخ چتين ليقلا اؤزومو ايچه ري سالا بيلديم. گيرميشديق ايچ ايچه!!! مئترو يولا دوشدو و هامي سيخ دايانميشدي. تر قوخوسو باسيردي!!! اؤز يانيمدا دئييرديم آدام گؤر نه گونه قالير!!! چاره سيز سيخيلميشام دؤرد، بلكه ده آلتي بيريانيمدان آيري كيشيلره، هئچ اليم ائله قاليب آداملارين آراسيندا، چكه بيليمرم. قاتار گئديب چاتدي " سعدي" دوراغينا، سعدي دوراغي توپخانا دوراغينين عكسينه، چوخدا خلوت اولار. فيكر ائليرم. بو دوراقدا( هئچ اولماسا) سحر چاغي لاري قاتارا مينمك اولماز!!! نيه كي توپخانا دوراغيندا يئترينجه آدام قاتارا مينيب دير. حتي دئمك اولار كي، اگر بير كيشي بو دوراقدا قاتاردان يئنه، بير داها ايچري گيره بيلمز!!! قاتارين قاپيلاري آچيلان همن، ايكي كيشي آداملاري باسا-باسا، قاتاردان آتيلديلار ديشاري، آتليان همن، ياخالاشديلار، باشلاديلار شاپالاق لاشماغا و سونرا دا تپيك لشمه يه، هامي شاشقين اونلارا باخيرديلار، ايكي كيشي هئچ بير سس چيخارتمادان شيرين شيرين ووروشوردولار!!! دئديغيم كيمي دوراق چوخ خلوت ايدي و كيمسه اونلاري آييرماغ اوچون يوخ ايدي. مئترودا كي كيشي لرده بو ريسكي قبول ائله ميرديلر كي مئترودان دوشوب اونلاري آييرسينلار!!! چونكو دوشسيديلر آشاغيا، بير داها مينه بيلمه يه جك ايديلر. قاتار اونلارين معطلي اولمويوب، قاپيلار باغلاندي، هله ايكي كيشي سس چيخارتمادان  مؤحكم ساواشيرديلار. قاتار يولا دوشدو. قاتار كؤهوله گيرمه ميشدن، پنجره دن گؤردوم قاتار معمورلارين ايكيسي، قاچا- قاچا، گئديرديلر او ايكي ساواشان كيشيه دوغرو!!!