كوچه نين باشيندان باخاندا، ديبده بير بؤيوك قيزميز قاپي گؤرسنير، قاپينين باشيندا  ايسه مئو قانادلاري اؤزلريني كوچه يه ساللاميشديلار. قيرميز قاپي نين يانيدا سئمنت چكيلميش دووارا قارا بوياقلا " قيرچي ولي" يازيلميشدير. آنجاق كوچه نين ديبي بو قاپي دئييل دير. بوردا كوچه ايكي قولا بؤلونور، ساغ قولو قيسسا دير و اوردا  بير ساري بوياقلي گؤزل دامداش گؤزه چيرپير، آنجاق سول قول اوزون اولدوغونا، بو قيزميز قاپيلي ائو كوچه نين ديبينده دئييلدير. بونا باخماياراق، او ائوين آدي ديب قاپي دي. ياني كوچه نين يئرلي لري هر زامان قيرچي ولي نين ائوينه ديب قاپي دئييرميشلر. بو ديب قاپيلي آدلانان ائوين حيطي چوخ گئنيش دير. قيرچي ولي قارا  قير بوشقالاريني حيطين بير بوجاغينا يئرلشديرسه ده، حيط اولدوقجا چوخ تميز و سهمانلي دير. يئرده بير چؤپ ده گؤره بيلمز سن!!! آخي بو ائوين خانيمي خاللي خاور دير. البته سن اونا خاللي خاور دئسن قوپباليغيني گؤتورر، سن ده او بيري آداملار كيمي خاوري بيرينجي باش گؤرنده  تاپتاجالانيب، خاورين بير يئرينده خال آختاراجاقسان، آما آداملار دئديغينين ترسينه، خاورين هئچ يئرينده خال زاد گؤرمه يه جك سن، خاور ده بو جور باخيشلارا عادت ائله ييب دير!!! دوولت باش يارماغي قاداغان ائتديكدن سونرا  هر ايل عاشورا گونو قانلي لار اوردا ايمام حوسئن اوچون زنجير وورارديلار، قيزيشارديلار، وئرد اوخويارديلار!!! داها قيزيشارديلار، حاج علي نين اوخودوغو  آغيت لار اونلاري داها دويغولانديراردي. يئرده كسيلميش قوربانلارين قانين گؤروب، قانلاري قايناردي، كيم ايسه هاردان بير قلينج گتيرردي، قانلي لار بير بير قيلينجي آليب باشلارينا چكرديلر، او ساعات كيمسه اونلارين اللريندن قيلينجي آلا بيلمزدي. ديب قاپينين احوالاتين دئمكله قورتارماز. خاور ديب قاپي دا آروادلارين قاشلارين آلاردي، اوزلرينه ساپ سالاردي. هردن آروادلاري ييغيب نذير آشي بيشيريب پايلاشارديلار ، بايرامدا گؤي گؤيرديب سمني قويارديلار. هره بير هئوه گتيريب، حيطده اوتوروب، جوجره ميش بوغدالاري ازرديلر، قازانچايا ساليب بيشيررديلر، سونرادا قارزانچانين باشيني خلوت ائدرديلر، چونكو خانيم حضرت فاطيمه گليب قازانا توپوروب، سمني لري شيرين اولاجاق ايدي. هردن  سمني لري ايسته ديك لري كيمي شيرين چيخمازدي، كيمينسه نفس آخيب قازانا باش چكميش دوشونرديلر. پاييزدا، كوچه نين آروادلاري ديب قاپي يا ييغيشيب، اريشته قوغورماق اوچون خمير ائله رديلر.  خميري تليسه بوركوب، اوغلانلاري چاغيرارديلار، اوغلانلارين اياقلاريني يوووب، خميرلري آياقلادارديلار. هله اريشته ماشيني چيخماميشكن، قيزلار گليب اريشته لري پيچاغينان كسرديلر. سونرا دا ديب قاپينين گئنيش حيطينده شريتلر باغلاييب، كسيلميش اريشتلري اونلاردان آسارديلار. سونرا دا آروادلار يورغون آرغين ائولرينه گئدرديلر، البت ده كي او گئجه كوچه ده هئچ كيمين ائوينده شام بشيريلمزدي، بونا آجيقلانان كيشيلر ده اولارديلار. ساباحسي گون، خاور بؤيوك ميس له يه نين، اوجاق اوستونه قوياردي، اريشته لري آز آز قوغوراردي، بيشميش اريشته لرين ايي كوچه ني بورويردي، اوگون كوچه ده هامي ناهارا اريشته بيشيررديلر. خاور آخشاما كيمي اريشته لري قوغوراردي، البته بو ايشي تك باشينا گؤرمزدي، سونا خالا دا اونا يارديم ائدردي، اريشته لرين قوغورماسي قورتاراندان سونرا، اريشته لري قاپاندا چكيب، هر كيمين پايين دوزگون آييرارديلار.

عؤمه رين اؤلومو گونو اونا توي توتارديلار، بالاخانيم اوز گؤزونو قارالاييب، اؤزونو عؤمر كيمي بير شكله سالاردي ، سونرادا  گولمه لي ادالار چيخارديب، هاميني گولدورردي،  آرادا خاور قاوال چالاردي، آروادلار اوينارديلار، من اوشاق اولاندا آروادلارين اويناماقلارين گؤرموشم، آنجاق بير آز بؤيودومسه، داها مني اوگونلر ائودن قوغارديلار. هله بير گون ياديماگلير، آروادلار خومئيني اؤلن گونو، عؤمرين اؤلومو گونو موناسيبه تينه توي توتموشدولار!!!  البته آروادلار بيلميردلير ائلنچي بير گونده خومئيني ده اؤلموشدور!!!

دئديغيم كيمي ديب قاپينين احوالاتي دئمك له قورتارن دئييل، من تام 16 ايل او ديب قاپيدا ، خاورين ائوينده، قيرچي ولي نين يانيندا ياشاديم. 14 ايل بوندان اؤنجه بير قارلي  قيشين آخشاميندا، مدرسه دن تازا گلميشديم، خاور مني يوللادي ولي نين يانينا!! ميدانين آشاغي كوچه سينده، ولي ني تاپماق اوقدر ده چتين ايش دئييلدير، قارا بوشقانين ايچينده ارينميش قيرين ايي دوز سئيدين ائويندن گليردي!!!!  هاوانين سويوقلوغو آجليغيمي گيزلتميشدير، كوچه ده بوشقانين يانيندا يانان اوتوندان تزه جه  قيزيشيرديم، ولي مني داما چاغيردي، پوتتوغو گؤتورب قيري بير قاريشديرديم سونرل  بير دولچا قير دولدوروب پيلله كن دن داما ديرماشديم، دولچاني دامين قيراغيندا يئره قويوب ايپ تليسي گؤتوردوم، ولي باشيني قالديرمادان دئيينيردي،

ايش تاپانميردين ديواري نيه قارالاميسان!!!! يوخسا هئش كيم بيلميردي كي اورا قيرچي ولي نين ائويدي؟؟؟؟

آردي وار...